सिन्धुलीको गोलन्जोर गाउँपालिका–६ छेत्पाबाट बेपत्ता भएका हायू समुदायका एकै परिवारका १५ जनामध्ये १२ जना पोखरामा फेला परेका छन्। उनीहरू पोखरामा सुरक्षित रहेको आफन्त बच्छु हायूले पुष्टि गरेका छन्।
गत साउन ११ गतेदेखि सम्पर्कविहीन रहेका परिवारका सदस्यहरूमध्ये १२ जना पोखरामा देखिएको जानकारी आएको हो। उनीहरू केही दिनअघि पोखराको एक होटलमा बसेको खुलेको थियो। होटल सञ्चालकले उनीहरू शनिबार आएर आइतबार होटल छाडेको बताएका थिए।
आफन्त बच्छु हायूका अनुसार सम्पर्कमा आएका १२ जनाको अवस्था सामान्य छ। बाँकीबारे भने अझै यकिन विवरण आउन बाँकी रहेको छ।
यसअघि हराइरहेका सबैलाई लिएर प्रहरी र स्थानीयस्तरमा व्यापक खोजी चलिरहेको थियो। उनीहरूको भेटिएको पुष्टि भएपछि परिवार र स्थानीयमा केही राहत महसुस गरिएको छ। तर, अझै सम्पर्कबाहिर रहेका अन्य सदस्यहरूको खोजी तीव्र पारिएको प्रहरीले जनाएको छ।
